अभिनेता अनमोल केसी र अभिनेत्री जसिता गुरुङको मुख्य भुमिका रहेको फिल्म ‘फर्की फर्की’को दोस्रो गीत रिलिज भएको छ । आगामी जेठ १० गतेबाट प्रदर्शनमा आउने फिल्मको यो गीत गायक नेरेन लिम्बुको हिट गीत ‘अन्तिम माया’को रि-एरेञ्ज हो ।
शुक्रबार सार्वजनिक गीतमा लिम्बुकै कम्पोज, लेखन र स्वर यो गीतमा समावेश छ । कथावस्तुको महत्वपूर्ण प्लटमा यो गीत तयार पारिएको छ । फिल्मका दुई मुख्य पात्रको विछोडको मनोविज्ञानमा गीत समावेश गरिएको बुझ्न सकिन्छ ।
फिल्मको गीतको भिडियोमा अनमोल केसी, जसिता गुरुङ फिचर्ड छन् । नरेन र अनमोलबीच दोस्रोपटक सांगीतिक सहकार्य भएको हो । अनमोल अभिनित ९ वर्षअघि रिलिज भएको फिल्म ‘जेरी’मा पनि नरेनकै हिट गीत ‘भन्न आउँदैन’लाई रि-एरेन्ज गरेर समावेश गरिएको थियो ।
नरेनकै हिट गीतलाई निर्माता रोहित अधिकारीले कथामा आवश्यक परेर रि-एरेन्जसहित समावेश गरिएको बताए । ‘कथासँग यो गीतको गहिरो सम्बन्ध छ । दर्शक यो गीत सुन्दै भावनाको गहिराइमा पुग्न सक्नुहुन्छ’ अधिकारीले भने ।
टाइम ट्राभल लभस्टोरीमा निर्माण भएको सिनेमाको कथा निर्देशक सुयोग गुरुङ आफैले लेखेका हुन् । फिल्ममा अनमोल र जसिताका अलवा कृष्ण मल्ल, निर्मल शर्मा, रवि काफ्ले, समृद्धि अर्याल लगायतको पनि अभिनय रहेको छ । फिल्ममा अभिनेता सलोन बस्नेत बिशेष भुमिकामा देखिएका छन् ।
रोहित अधिकारी फिल्मस्को प्रस्तुतिमा निर्माण भएको फिल्मका निर्माता ओम प्रकाश अग्रवाल र रोहित अधिकारी हुन् । फिल्मका सह-निर्माता मनोज ओली र रामु न्यौपाने हुन् भने मोती कार्की र अनिरुद्र गिरी कार्यकारी निर्माताको रुपमा रहेका छन् ।
यो फिल्ममा नरेन्द्र मैनालीको छायांकन, सुरेन्द्र पौडेलको सम्पादन, रोमन बज्रचार्य र नरेन लिम्बूको संगीत तथा अष्ट महर्जनको द्वन्द्व निर्देशन र शंकर पाण्डेले प्रोडक्सन म्यानेजरको रुपमा काम गरेका छन् । फिल्मलाई गोविन्द शाहीको काफिया फिल्मस् र कुवेर सिने प्रोडक्सनले वितरण गर्दैछन् ।
