काठमाडौं । निर्देशक सौरभ चौधरीको निर्देशनमा निर्माण हुन लागेको बहुप्रतीक्षित चलचित्र ‘द राइज अफ साम्राज्य’मा अभिनेता सुशील श्रेष्ठ जोडिएका छन् । छायांकनको अन्तिम तयारीमा रहेको चलचित्रमा निर्देशक चौधरीले सुशीललाई महत्वपूर्ण भूमिकाका लागि अनुबन्ध गरेका हुन् ।
यसअघि नै चलचित्रमा सौगात मल्ल, दयाहाङ राई, नाजिर हुसेन, विजय बराल, अञ्जना बराइली र अमरप्रताप श्रेष्ठ जस्ता कलाकार अनुबन्धित भइसकेका छन् । सुशिलको प्रवेशसँगै चलचित्रको कलाकारको लाइनअप थप बलियो बनेको छ । निर्माण पक्षका अनुसार चलचित्रमा अधिकांश कलाकारको भूमिका महत्वपूर्ण रहनेछ ।
निर्देशक सौरभ चौधरीले सुशीलले चलचित्रमा मुख्यमध्ये एक भूमिकामा अभिनय गर्ने जानकारी दिएका छन् । यसअघि फरक–फरक शैलीका चलचित्रमा काम गर्दै आएका सुशिलका लागि ‘द राइज अफ साम्राज्य’को भूमिका नयाँ चुनौती बन्ने अपेक्षा गरिएको छ ।
निर्माण टिमले चलचित्रको छायांकनका लागि ७० दिनको तालिका तयार पारेको छ । चलचित्रको अधिकांश छायांकन पूर्वी नेपालका विभिन्न स्थानमा गरिनेछ । कथा र परिवेशअनुसार आवश्यक लोकेसन छनोटको काम पनि अन्तिम चरणमा पुगेको निर्माण पक्षले जनाएको छ ।
यो नेपाली चलचित्रकै ठूलो स्केलको एक्सन सिनेमा हुने निर्माण पक्षको दाबी छ ।
निर्देशक चौधरीले यसपटक आफूले यसअघि निर्माण गरेका चलचित्रभन्दा ठूलो क्यानभास र फरक स्तरको प्रस्तुति दिने योजना बनाएका छन् । निर्माण पक्षले चलचित्रलाई नेपाली चलचित्रमै ठूलो स्केलमा बन्न लागेको ‘एपिक एक्सन ड्रामा’का रूपमा प्रस्तुत गरेको छ ।
डार्क हर्स इन्टरटेन्मेन्टको ब्यानरमा निर्माण हुन लागेको चलचित्रको कथा तथा पटकथा चर्चित उपन्यासकार बुद्धिसागरले लेखेका हुन् । साहित्यिक लेखनमा छुट्टै पहिचान बनाएका बुद्धिसागरको कथा तथा पटकथामा निर्माण हुने भएकाले चलचित्रको कथावस्तुलाई लिएर पनि चासो बढेको छ ।
चलचित्रमा निर्देशक सौरभ चौधरीले एक्सन, ड्रामा र कथानकलाई ठूलो स्केलमा प्रस्तुत गर्ने तयारी गरेका छन् । निर्माण पक्षले यसलाई नेपाली चलचित्रको एक्सन विधामा नयाँ स्तरको अनुभव दिने लक्ष्यसहित अघि बढाइएको जनाएको छ ।\
चलचित्रका निर्माता प्रवेश चौधरी र निला देव हुन् । विश्वास बस्नेत (बेन) को–प्रोडुसर तथा शंकर पाण्डे कार्यकारी निर्माता रहेका छन् ।
चलचित्रको छायांकन मानकृष्ण महर्जनले गर्नेछन् भने एक्सन निर्देशनको जिम्मेवारी श्री श्रेष्ठले सम्हाल्नेछन् । ठूलो स्केलको एक्सन ड्रामाका रूपमा निर्माण हुन लागेको चलचित्रमा एक्सन दृश्यलाई विशेष प्राथमिकता दिइने निर्माण पक्षले जनाएको छ ।
चलचित्रको डिजिटल पार्टनर ओएसआर डिजिटल रहेको छ भने पब्लिसिटी पार्टनर टौवा स्टुडियो रहेको छ । चलचित्रको वितरणको जिम्मेवारी डिसीएनले लिएको छ ।
कलाकारको बलियो लाइनअप, बुद्धिसागरको कथा–पटकथा, लामो छायांकन तालिका र ठूलो क्यानभासका कारण ‘द राइज अफ साम्राज्य’ नेपाली चलचित्र क्षेत्रमा चासोको विषय बनेको छ ।
