काठमाडौं । लोकप्रिय टेलिभिजन हास्य शो ‘कमेडी दरबार’ अब ठूलो पर्दामा आउने तयारीमा लागेको छ ।
यो टिमले सोमवार नयाँ चलचित्र ‘क का कि की’ को एक पोस्टर सार्वजनिक गर्दै औपचारिक रूपमा निर्माणको घोषणा गरेको हो ।
विक्की अग्रवाल र श्रद्दा प्रसाईँले संयुक्त रूपमा गर्ने चलचित्र ‘क का कि की’मा नेपाली सिनेमा क्षेत्रका स्थापित कलाकारहरू गौरी मल्ल, तृप्ति नदकर, रेखा थापा र महेश त्रिपाठी मुख्य भूमिकामा देखिनेछन् ।
निर्माणपक्षले सार्वजनिक पोस्टर चलचित्रको शीर्षक, पोस्टरमा देखिएका कलाकारहरूको हाउभाउ र ‘कमेडी दरबार’ टिमको शैली हेर्दा यो पूर्ण रूपमा हास्यप्रधान सिनेमा हुने स्पष्ट देखिन्छ ।
यस्तै, यो चलचित्रमा सामाजिक सञ्जालबाट चर्चामा आएका कलाकारहरू मिस पबी, पवन खतिवडा, हिमेश पन्त, सुजता श्रेष्ठ, विश्वास तिम्सिना र सीडी विजय अधिकारी लगायतको पनि विशेष भूमिका रहनेछ ।
निर्माता श्रद्दा प्रसाई र सुमित्रा थापाको प्रस्तुतिमा तयार हुन लागेको यस चलचित्रको पटकथा विक्की अग्रवालले लेखेका हुन् भने कथामा विक्की अग्रवाल, बिकाश अर्याल र सरोज भण्डारीको समेत लेखन रहनेछ ।
यो चलचित्रका छायांकन निर्देशक (डीओपी) सुदिप बराल रहनेछन् । फिल्मको थिमपोस्टर रोयल भिमसेनले तयार गरेका हुन् ।
फिल्मको वितरण श्री वेंकेटेशले, अन्तर्राष्ट्रिय वितरण सेवन सिजले र डिजिटल अधिकार ओएसआर डिजिटलले लिने भएका छन् । हाल टेलिभिजनमा निकै लोकप्रिय ‘कमेडी दरबार’ सञ्चालन गरिरहेको निर्देशक अग्रवालको टिमको यो पहिलो फिल्मी प्रोजेक्ट हो ।
निर्देशक अग्रवालका अनुसार चलचित्रको छायांकन आगामी दशैंको टिकाको भोलीपल्टबाट प्रारम्भ हुनेछ । फिल्मको बजेट र प्रदर्शन मिति हाल खुलाइएको छैन ।
फिल्म घोषणापछि निर्देशक बिक्की अग्रवालले भने, ‘आफ्नो फिल्मी करिअरको सुरुआत नै अग्रजहरूसँग सहकार्य गर्ने उत्कृष्ट अवसर पाएको छु । ‘क का कि की’ को यस यात्रामा हामीलाई विश्वास छ कि सम्पूर्ण दर्शकहरूको साथ फेरि पनि प्राप्त हुनेछ । हाम्रो टिम ‘कमेडी दरबार’ को एउटै उद्देश्य अब टेलिभिजनसँगै हलहरूमा पनि तपाईंहरूको हाँसो ल्याउनु हो ।’
