काठमाडौँ । साउन २३ गते यो सातादेखि दुई नयाँ नेपाली चलचित्र ‘सिटामोल’ र ‘मोहर’ देशभरका सिनेमाघरमा एकसाथ प्रदर्शनमा आउँदैछन् । फरक कथावस्तु बोकेका यी दुवै चलचित्रको मंगलबारबाटै अग्रिम टिकट बुकिङ खुला गरिएको छ, जसले दर्शकमाझ उत्साह थपेको छ ।
राजबहादुर साने निर्देशित ‘सिटामोल’ कर्णाली क्षेत्रको सामाजिक यथार्थ, जनयुद्धपछिको मनोविज्ञान र सम्बन्धमा आउने उतारचढावको कथामा आधारित छ।
चलचित्रमा एक पूर्वमाओवादी कमान्डरको शारीरिक अशक्तता र त्यसले परिवारमा पार्ने प्रभावलाई मार्मिक ढंगले प्रस्तुत गरिएको छ।
चलचित्रका मुख्य अभिनेता सौगात मल्लले ‘सिटामोल’ लाई केवल औषधिको नाम नभई मनको पीडामा मलम लगाउने प्रतीकको रूपमा व्याख्या गरेका छन्।
बेनिशा हमालले पनि यस चलचित्रले बिग्रिएको सम्बन्ध सुधार्ने सन्देश दिने बताएकी छिन्। चलचित्रमा सौगात र बेनिशाका साथै श्री कृष्ण निरौला, जानुका विश्वकर्मा, लोकेन्द्र लेखक लगायतका कलाकारको अभिनय रहेको छ।
ओम प्रतीकको लेखन तथा निर्देशनमा बनेको ‘मोहर’ एक सामाजिक-थ्रिलर चलचित्र हो। यसले सुदूरपश्चिममा कुप्रथाको रूपमा रहेको देउकी प्रथा र त्यसले बालिकामाथि पार्ने हिंसाको कथालाई उठाएको छ।
चलचित्रको ट्रेलरमा प्रेम, बिछोड, बदला र सस्पेन्सका साथै देउकी प्रथाको नाममा हुने शोषणलाई देखाइएको छ। चलचित्रमा पल शाह, बेनिशा हमाल र नीति शाह मुख्य भूमिकामा छन् । उनीहरुका साथै लक्ष्मी गिरी, अर्जुनजंग शाही र बाल-कलाकार सारा शर्माको पनि अभिनय छ।
देशका प्रमुख मल्टिप्लेक्स चेनहरुले दुवै चलचित्रलाई लगभग बराबरी शो दिएका छन्। क्युएफएक्सले काठमाडौंभित्र ‘सिटामोल’लाई १५ र ‘मोहर’लाई १४ शो दिएको छ। ] त्यसैगरी, दोस्रो ठूलो चेन आइएनआइ सिनेमाजले ‘मोहर’लाई १२ र ‘सिटामोल’लाई ११ शो उपलब्ध गराएको छ भने वान सिनेमाजले दुवैलाई ६-६ शो दिएको छ।
खल्ती एपको बुधबार दिउँसोसम्मको तथ्यांकअनुसार, ‘मोहर’ले देशव्यापी करिब ७० र ‘सिटामोल’ले ६० को हाराहारीमा शो पाएका छन्। अन्य मल्टिप्लेक्सहरुले पनि बुकिङ खुलाइसकेकाले शो संख्यामा केही वृद्धि हुने अनुमान छ।
शुक्रबार यी दुई सिनेमा रिलिज हुँदैगर्दा विशेष संयोग के छ भने, दुवै चलचित्रमा अभिनेत्री बेनिशा हमाल मुख्य भूमिकामा छिन्। एकै दिन आफ्ना दुई महत्त्वपूर्ण चलचित्र रिलिज हुन लाग्दा उनी प्रचारप्रसारमा व्यस्त छिन्। यसलाई उनी आफ्नो लागि खुसीको अवसर मान्छिन् र दुवै चलचित्रबाट उत्तिकै आशावादी रहेको बताउँछिन्।