आगामी असोजको २ गतेबाट रिलिजमा आउन लागेको फिल्म ‘झिंगे दाउ २’को तीन नयाँ पोष्टर सार्वजनिक भएको छ । निर्माण पक्षले फिल्मको प्रचाप्रसारको सुरुवातका लागि तीनवटा पोस्टर सार्वजनिक गरिएको जनाएको छ । ज्ञानेन्द्र देउजाको निर्देशनमा तयार भएको यो फिल्ममा सुलभ प्रतिक, प्रतिक देउजा, समिक्षा देउजाको लगानी छ ।
यो फिल्मको सार्वजनिक एक पोस्टरमा केकी अधिकारी र आँचल शर्मा हर्षित मुद्रामा छन् । यता, हिउँवाला गौतम, महेश त्रिपाठी र कुशलको भावुक अनुहार देख्न सकिन्छ । यस्तै, अर्को एक पोष्टरमा दशैंको उमंग देख्न सकिन्छ । फिल्मका मुख्य चार पात्रहरु दशैंको उमंगमा रमाएका छन् । यसले, फिल्मको कथावस्तुमा दशैंलाई समेत समावेश गरेको प्रष्ट हुन्छ । तेस्रो पोष्टरमा आर्यन सिग्देललाई पनि देखाइएको छ । मुख्य चार पात्रहरु अचम्मित भावमा देखिएका छन् भने आर्यनले उनीहरुलाई रोकेको जस्तो देखिन्छ ।
विष्णु घिमिरे ‘कल्पित’को छायांकन रहेको यो फिल्ममा मित्र डी गुरुङको सम्पादन, अर्जुन पोखरेलको संगीत, रामजी लामिछानेको नृत्य, रोशन श्रेष्ठ एक्सन छ ।
पोष्टरले फिल्मको विभिन्न पाटोलाई चित्रित गरेको छ । यो फिल्ममा केकी अधिकारी, आँचल शर्मा, महेश त्रिपाठी, कुशल बिष्ट, आर्यन सिग्देल, हिउँवाला गौतम, सरोज खनाल, बसुन्धरा भुसाल, चैत्यदेवी सिंह, संगम भण्डारी, विजय देउजा, अंशु महर्जन, अयभराज बराल, उत्तम केसी, शिवहरि वैरागी नेपाल, आशा भुसाल, रेनु प्रधान, विनोद कुमार पौडेल लगायतका कलाकारहरुको अभिनय छ । फिल्ममा मदनकृष्ण श्रेष्ठ र मिथिला शर्माले अतिथी कलाकारको रुपमा काम गरेका छन् ।
परिच्छेद सेन, गोविन्द फुयाल र शिशिर चालिसेको पटकथा तथा संवाद रहेको यो फिल्ममा विवेक बस्नेत, ईश्वर सिन्केमनाको छायांकन छ ।
चन्द्र बहादुर भण्डारी र गिरिराज घिमिरेको मुख्य सहायक निर्देशन रहेको फिल्म कपनगढी सिनेमा प्रा।लि र फिल्म क्र्यू नेपाल प्रा।लिको प्रस्तुतिमा यो फिल्म निर्माण भएको हो । ३ वर्ष अगाडि रिलिजमा आएको फिल्म ‘झिंगे दाउ’ले बक्स अफिसमा सुखद व्यापार गरेको थियो ।
