काठमाडौं । असोजको ३ गतेबाट प्रदर्शनमा आउने चलचित्र ‘जारी २’को टिजर सार्वजनिक गरिएको छ । कवि उपेन्द्र सुब्बाको लेखन तथा निर्देशनमा बनेको यो चलचित्रको टिजरमा विशेषगरी लिम्बु समुदायको पहिचान च्याब्रुङ बाजाको सेरोफेरोमा रहेर आफ्नो समुदायको कथा भनिएको छ ।
साढे २ मिनेट लामो टिजरमा च्याब्रुङमा नाच्न नआउने लिम्बूलाई ‘नाङ्गो पहाड’सँग तुलना गर्ने संवादबाट सुरु भएको ट्रेलरले च्याब्रुङलाई लिम्बूको खुसीको स्वरको रुपमा व्याख्या गर्दै च्याब्रुङ मासिए लिम्बूहरु नै मासिने सन्देश दिइएको छ । लिम्बू संस्कृति, पारिवारिक कलह र भावनात्मक उतारचढावको कथा पनि टिजरमा छ ।
टिजरमा नायक दयाहाङ राई र नायिका मिरुना मगरको प्रेम र घर झगडाको कथा पनि छ । साथमा, नायिका ऋचा शर्माको प्रवेशलाई पनि विशेष रुपमा हेर्न सकिन्छ ।
यो फिल्मको टिजर हेर्दा यसले लिम्बु समुदायको कथालाई उठान गरेको प्रष्ट हुन्छ । यसअघि पनि ‘जारी’ले लिम्बु समुदायको कथा नै उठान गरेको थियो ।
यो चलचित्रमा दया, मिरुना, ऋचाको साथमा वुद्दि तामाङ, पुष्कर गुरुङ, प्रेम सुब्बा, माओत्से गुरुङ, मानहाङ लावती, विष्णु मोक्तान, कमलमणि नेपाल, अनिल सुब्बा, रेखा लिम्बु, बेदना राई, सिर्जना निङलेखुको अभिनय छ ।
बाँसुरी फिल्मस् र कबड्डी फिल्मस्को व्यानरमा निर्माण भएको चलचित्रको व्यापारमा सिंगो फिल्म क्षेत्रको आँखा परेको छ । २ वर्षअघि ‘जारी’ले उत्कृष्ट प्रतिक्रिया प्राप्त गर्दै बक्स अफिसमा सानदार कमाइ गरेकाले यसको सिक्वेल पनि सफल हुने विश्लेषण गरिएको छ । ‘जारी’ले बक्स अफिसमा १७ करोड माथिको ग्रस कलेक्शन गरेको थियो ।
