काठमाडौं । चन्द्र पन्तको निर्देशनमा निर्माण हुने चलचित्र ‘आ बाट आमा’ को छायांकन सुरु गरिएको छ ।
निर्माण पक्षले बिहीबार तनहुँको गलेश्वर मन्दिरमा करिब २ सय जना बटुकहरुले हवनसहित पूजाआर्चना गरी शुभ मुहूर्त गरिएसँगै चितवनबाट छायांकन सुरु गरिएको हो ।
निर्देशक पन्तले चलचित्रको छायांकन तालिका करिब एक महिनाको रहेको जानकारी दिए । उनका अनुसार चितवन, काठमाडौं र भारतको हैदरावादमा फिल्म खिचिनेछ ।
आर्या इन्टरटेन्मेन्टको ब्यानरमा निर्माण हुने चलचित्र ‘आ बाट आमा’मा अभिनेता पल शाह, दक्षिण भारतीय कलाकार प्रदीप रावत, विपना थापा, सिम्रन पन्त, उषा उप्रेतीलगायत मुख्य भूमिकामा देखिनेछन् ।
२०८२ फागुन १५ गतेबाट देशभर प्रदर्शनमा आउने यस चलचित्रले आमा र सन्तानबीचको स्नेह र सम्बन्धको भावनात्मक कथा बोकेको निर्माणपक्षको भनाइ छ ।
फिल्मका निर्माता कृष्णप्रसाद सुवेदी, ध्रुव न्यौपाने र प्रकाशजंग कुँवर हुन् भने कार्यकारी निर्माता करण सिंह रहेका छन् । नवराज उप्रेती छायांकन निर्देशन रहेको चलचित्रमा संगीत कोशिस क्षेत्री, बाबुल गिरी र थानेश्वर गौतम रहने छ मुख्य सहायक निर्देशक कुलदीप शर्मा रहने छ ।
निर्माण पक्षका अनुसार फिल्मको विदेश प्रदर्शन अधिकार अष्ट्रेलिया र न्यूजिल्यान्डमा बिक्री भइसकेको छ । ती देशका लागि वितरण अधिकार हिमारु इन्टरटेन्मेन्टले खरिद गरेको छ भने नेपालमा आरआर फिल्म्सले वितरणको जिम्मा लिएको छ ।
