काठमाडौं । रक्षा बन्धनको अवसर पारेर निता फिल्म्सले निर्माण गर्न लागेको नेपाली चलचित्र ‘पार्वती’ का दुई फरक मूडका पोस्टर सार्वजनिक भएका छन्। नायिका निता ढुंगाना अधिकारीको निर्देशनमा बन्ने यो फिल्मको प्रदर्शन मिति समेत निर्माणपक्षले घोषणा गर्दै आगामी माघ १ गते रिलिज गर्ने जनाएको छ।
सार्वजनिक पहिलो पोस्टरमा ‘पार्वती’ पात्रलाई पहेँलो छातामुनि, सिठी र पानीको बोतल बोकेर गम्भीर मुद्रामा देखाइएको छ, जसले उनको जीवनमा आउन सक्ने चुनौती, सोचमग्न स्वभाव र भित्रै लुकेको संवेदनशीलता अभिव्यक्त गर्छ। दोस्रो पोस्टरमा भने उनी गाउँले पोशाकमा हल्का मुस्कान र लजालु अदा सहित प्रस्तुत भएकी छन्, जसले उनको बालपनको रमाइलो, जीवनप्रतिको सहज दृष्टिकोण र आन्तरिक निराशताको संकेत दिन्छ।
फिल्मको कथा निता ढुंगानाले लेखेकी हुन् भने पटकथा तथा संवाद शिवम् अधिकारीले तयार पारेका हुन्। छायांकन कविर लाल र शाहिद लालको रहनेछ। निर्माण टिममा सानिजा अधिकारी, नरसरी अधिकारी र पवन ढुंगाना छन्। निर्माणपक्षका अनुसार, ‘पार्वती’ हास्य, भावना र सामाजिक सन्देश मिसिएको कथा हो, जसमा एक साधारण पात्रको दृष्टिकोणबाट जीवनका रंग, सम्बन्धका मिठास र संघर्षका भाव प्रस्तुत गरिनेछ।
आगामी असोजबाट छायांकन सुरु हुने फिल्मका अन्य कलाकार तथा प्राविधिकबारे भने निर्माणपक्षले हाल खुलाएको छैन। निर्देशक अधिकारीका अनुसार केही दिनमै कलाकार सूची र थप प्राविधिक विवरण सार्वजनिक गरिनेछ। फिल्मको उपत्यका भित्रको वितरण रिच इन्टरटेनमेन्ट र एप्पल इन्टरटेनमेन्टले गर्नेछन् भने उपत्यका बाहिरको वितरण जिम्मा एफडी कम्पनीले लिएको छ।
