नेपाली चलचित्र क्षेत्रसँग सम्बन्धित समाचार र सामग्रीहरूको प्रकाशनमा विशेष पहिचान बनाउन सफल सिनेपत्रिका डटकम आजबाट आफ्नो दोस्रो वर्षमा प्रवेश गरेको छ। अनलाइन मार्फत सत्य, तथ्यपूर्ण र नवीनतम समाचारहरूको माध्यमद्वारा नेपाली पाठकमाझ छुट्टै स्थान बनाएको सिनेपत्रिकाको यो यात्रा उत्साहजनक रहँदै आएको छ।
नेपाली सिनेमा, कलाकार, संगीत, साहित्य र मनोरञ्जनका विविध पक्षहरूलाई फरक दृष्टिकोणबाट उजागर गर्न, समस्याहरू औंल्याउन र समाधानतर्फ सकारात्मक पहल गर्न सिनेपत्रिकाले महत्वपूर्ण योगदान पुर्याउँदै आएको छ।
विशेषगरी नेपाली सिने क्षेत्रमा बढ्दै गएको अनलाइन मिडियाको भीडभित्र आफ्नो पहिचान र विश्वसनीयता कायम गर्नु सिनेपत्रिकाको प्रमुख विशेषता हो। सत्यतथ्यमा आधारित समाचारहरू र आलोचनात्मक विश्लेषणहरूको माध्यमद्वारा पाठकहरूलाई ज्ञान र मनोरञ्जन प्रदान गर्नु हाम्रो मुख्य उद्देश्य रहेको छ।
यद्यपि, कला र साहित्य क्षेत्रमा वास्तविक समीक्षात्मक पत्रकारिताको खडेरी परेको वर्तमान समयमा, सिनेपत्रिकाले वस्तुनिष्ठ र निष्पक्ष सामग्रीको मापन गरेर समाचार, टिपण्णी र लेख प्रस्तुत गर्न प्रतिबद्ध रहेको छ। “पर्म र बखानभन्दा पर, सत्यको लागि समर्पित” भन्ने आदर्शलाई आत्मसात् गर्दै, हामी नेपाली कला र साहित्यलाई अझ समृद्ध बनाउने अभियानमा निरन्तर लागिरहनेछौं।
यस महत्त्वपूर्ण अवसरमा सिनेपत्रिका डटकम आफ्नो समर्पित पाठक, लेखक, शुभचिन्तक र सहयोगीहरूलाई विशेष धन्यवाद व्यक्त गर्दछ। तपाईंहरूको माया, सुझाव, र सहयोगकै कारण आज हामी यो स्थानमा पुग्न सफल भएका हौं। आगामी दिनहरूमा पनि गुणस्तरीय सामग्रीमार्फत मनोरञ्जन क्षेत्रका पाठकहरूलाई सेवा पुर्याउने हाम्रो अठोट छ।
