काठमाडौं । दक्षिण भारतीय सुपरस्टार धनुष र ‘सीता रामम’ फेम अभिनेत्री मृणाल ठाकुरबीच प्रेम सम्बन्ध रहेको चर्चाले सिने जगत तातेको छ। हालैका दिनमा विभिन्न सार्वजनिक कार्यक्रममा उनीहरूको बाक्लो उपस्थिती र निकटताले यी अड्कलबाजीहरूलाई थप बल पुर्याएको हो।
यो चर्चा विशेषगरी ‘सन अफ सरदार २’ को प्रिमियर र धनुषको आगामी हिन्दी फिल्म ‘तेरे इश्क मे’ को र्याप-अप पार्टीमा उनीहरू सँगै देखिएपछि सुरु भएको हो । यसबाहेक, जुन महिनामा काजोलको फिल्म ‘माँ’ को विशेष स्क्रिनिङमा पनि उनीहरूको सुमधुर सम्बन्धले सबैको ध्यान तानेको थियो।
भारतीय सञ्चारमाध्यम न्यूज १८ ले एक स्रोतलाई उद्धृत गर्दै उनीहरू वास्तवमै सम्बन्धमा रहेको दाबी गरेको छ। समाचारका अनुसार, यो सम्बन्ध अहिले प्रारम्भिक चरणमा रहेकाले दुवैजना यसलाई सार्वजनिक गर्न चाहँदैनन्। उनीहरूको रुचि र विचार मिल्ने भएकाले एकअर्काप्रति आकर्षित भएको पनि स्रोतको भनाइ छ।
‘सीता रामम’ को अपार सफलतापछि मृणाल ठाकुर दक्षिण भारतीय फिल्म उद्योगमा निकै व्यस्त छिन्। हाल उनी आफ्नो फिल्म ‘डकैत: ए लभ स्टोरी’ को छायांकनका लागि मुम्बई र हैदराबाद आउजाउ गरिरहेकी छिन्। यही व्यस्तताका क्रममा एक कार्यक्रममा धनुषसँग उनको भेट भएको र मित्रता प्रेममा बदलिएको अनुमान गरिएको छ।
धनुषले हालै मात्र पत्नी ऐश्वर्या रजनीकान्तसँग १८ वर्षे वैवाहिक सम्बन्ध अन्त्य गरेका हुन्। उनीहरूका दुई छोरा छन्। अर्कोतर्फ, केही समयअघि मृणालको नाम र्यापर बादशाहसँग जोडिएको थियो, तर उनले सो हल्लालाई ठाडै अस्वीकार गरेकी थिइन्।
यद्यपि, यी सबै चर्चा र मिडिया रिपोर्टका बाबजुद हालसम्म न त धनुष न त मृणालले नै आफ्नो सम्बन्धबारे आधिकारिक रूपमा कुनै प्रतिक्रिया दिएका छैनन् । जसले गर्दा उनीहरूको सम्बन्धको वास्तविकता के हो भन्ने कौतुहलता कायमै छ।
