काठमाडौं । निर्देशक अरुण लामाले आफ्नो दोस्रो फिल्म ‘तथास्तु’ निर्माण गर्ने घोषणा गरेका छन्। उनले एक पोस्टर सार्वजनिक गर्दै फिल्मको औपचारिक घोषणा गरेका हुन्। यसअघि ‘डोरी’ निर्देशन गरेका लामाको यो दोस्रो निर्देशन हो।
सार्वजनिक पोस्टरअनुसार, फिल्मको छायांकन आगामी वर्ष, अर्थात २०८३ सालको सुरुवातमा सुरु हुनेछ भने प्रदर्शन सन् २०२७ मा गर्ने योजना बनाइएको छ। फिल्मलाई जी सेभेन प्रोडक्सन प्रा.लि.ले प्रस्तुत गर्नेछ।
निर्देशक लामाका अनुसार ‘तथास्तु’ केवल फिल्म नभई कर्म, भाग्य र आत्मिक रूपान्तरणको कथा हो। फिल्मले अन्तरद्वन्द्व, आध्यात्मिक यात्रा र सामाजिक यथार्थबीचको द्वन्द्व उजागर गर्नेछ। साथै, ‘सिमुलेसन थ्योरी’को पृष्ठभूमिमा आधारित यो कथामा मानव लोक र दिव्य लोकबीचको द्वैतलाई चित्रण गरिनेछ।
फिल्मको नाम ‘तथास्तु’ राख्नुको अर्थ खुलाउँदै लामाले भने, “यसको अर्थ हो — तपाईंले चाहनुभएको कुरा जस्तै होस्। तर, के हामीले चाहेका सबै कुरा साँचिकै ठीक हुन्छन्? के हामी त्यसका लागि तयार छौं? जीवनमा प्राप्तिभन्दा बुझाइ महत्वपूर्ण हुन्छ। तपाईंले मागेको कुरा तब मात्र सार्थक हुन्छ, जब तपाईं त्यसलाई ग्रहण गर्न तयार हुनुहुन्छ।”
फिल्म दुई चरणमा खिचिने छ भने छायांकन नेपाल र भारतमा गरिनेछ। निर्देशक लामाले फिल्ममा नेपाल र भारतका अप्रत्याशित तर प्रतिभाशाली अनुहारहरू, नयाँ पुस्ताका चर्चित कलाकार, स्थापित अभिनेता–अभिनेत्री तथा नयाँ उदाउँदै गरेका प्रतिभालाई समावेश गरिने बताएका छन्। फिल्म नेपाली र हिन्दी दुवै भाषामा निर्माण गरिनेछ।
लामाको डेब्यु फिल्म ‘डोरी’ले खासै व्यापारिक सफलता हासिल गर्न नसकेको थियो। उनले भनेका छन्, “डोरी प्रदर्शन हुँदा राजनीतिक परिस्थिति अनुकूल थिएन। प्रजातन्त्र समर्थक आन्दोलनका कारण हलहरू सुनसान थिए। त्यसैले फिल्म दर्शकसम्म पुग्न सकेन। तर जसले हेरे, उनीहरूले रुचाए।”
