काठमाडौं । चर्चित कलाकार केदार घिमिरे ‘माग्ने बुढा’ नयाँ चलचित्र ‘जहाजैमा’मा अनुबन्धित भएका छन् । निर्देशक कृषा चौंलागाईको निर्देशनमा बन्ने यो बहुप्रतिक्षित चलचित्रका लागि मंगलबार औपचारिक रूपमा उनले सम्झौता गरेका हुन् ।
यो फिल्ममार्फत माग्ने बुढा र निर्देशक चौंलागाईको पहिलो पटक सहकार्य हुने भएको छ । पछिल्लो समय चलचित्र ‘माग्ने राजा’मा ६१ लाख पारिश्रमिक लिएर चर्चामा आएका घिमिरेले ‘जहाजैमा’का लागि कति पारिश्रमिक लिएका हुन् भन्ने चाहिँ सार्वजनिक गरिएको छैन ।
कलाकार घिमिरेको सहभागिता पुष्टि भएपछि निर्देशक चौंलागाईले भनिन्, “केदारजी अहिलेका सर्वाधिक लोकप्रिय कलाकार हुनुहुन्छ। हाम्रो फिल्ममा उहाँको भूमिका अत्यन्त महत्वपूर्ण छ । उहाँलाई कास्ट गर्न पाउँदा हामी निकै उत्साहित छौं ।”
हाल चलचित्रको प्रि–प्रोडक्सन चरण चलिरहेको छ । निर्माण टिमका अनुसार ‘जहाजैमा’मा मल्टिस्टारर कलाकारहरुको सहभागिता रहनेछ। केही कलाकारहरुसँग कुराकानी भइरहेको जनाइएको छ भने जापानी अभिनेत्री रुजेल इचिमिया भने पहिले नै फाइनल भइसकेकी छिन् ।
नेपाल, जापान र फिलिपिन्सको कथा बोकेको यो चलचित्र ती तीन देशमै खिचिनेछ । यूएनए प्रोडक्सनको ब्यानरमा बन्ने फिल्मको छायांकन भदौदेखि सुरु हुने र सन् २०२६ मा प्रदर्शन गर्ने लक्ष्य लिइएको छ ।
