काठमाडौं । नेपाली चलचित्र ‘स्त्री’ को शुभ मुहूर्त विशेष समारोहसहित सम्पन्न गरिएको छ । बिहीबार ऋषि पंचमीको अवसरमा राजधानीको कमलादीस्थित गणेशस्थान मन्दिरमा पूजा–पाठ तथा क्यामेरा पूजापछि फिल्मको आधिकारिक सुरुवात गरिएको हो ।
जीवन शाहीको लेखन तथा निर्देशनमा बन्ने यो चलचित्र यही भदौ १४ गतेदेखि छायांकनमा प्रवेश गर्नेछ । निर्देशक शाहीका अनुसार फिल्मको सम्पूर्ण छायांकन काठमाडौँ र आसपासका क्षेत्रमा गरी ३५ दिनको सेड्युल तय गरिएको छ ।
सामाजिक कथामा आधारित ‘स्त्री’ मा कलाकार प्रमोद अग्रहरि, सलोन बस्नेत, रिस्ता बस्नेत र नम्रता श्रेष्ठको प्रमुख भूमिका रहनेछन् । त्यस्तै बाल कलाकार दिप्सन चिलवालले पनि महत्वपूर्ण भूमिका निर्वाह गर्नेछन् ।
मेला रेकर्डिङ स्टुडियोको ब्यानरमा तयार हुन लागिरहेको चलचित्रका निर्माता समिर राई रहेका छन् । कथा जीवन शाहीकै भए पनि पटकथा भने शाहीले किशन अर्यालसँग मिलेर तयार पारेका हुन् ।
फिल्ममा संगीतकारका रूपमा बाबुल गिरी, प्रोडक्सन म्यानेजर केवलमान सिंह बस्नेत, प्रोजेक्ट म्यानेजर सुबास काफ्ले, द्वन्द्व निर्देशन देव महर्जन, प्रमुख सह–निर्देशक चन्द्र भण्डारी तथा मेकअप आर्टिस्ट श्याम बराल रहनेछन्। ड्रेस डिजाइनको जिम्मा सुकनिता चौलागाईंले पाउनेछिन् ।
