काठमाडौं । आजको डिजिटल युगमा मोबाइल, ट्याब्लेट, टेलिभिजन, कम्प्युटर जस्ता उपकरण बालबालिकाका लागि खेलौना जस्तै बनेका छन्। तर, यही प्रविधिको अत्यधिक प्रयोगले उनीहरूमा गम्भीर असर पार्न थालेको छ, जसबाट शारीरिक, मानसिक र भावनात्मक असर परिरहेको छ।
पारिवारिक आत्मीयता कमजोर हुनु, बच्चालाई चुप राख्न डिजिटल ग्याजेट दिने बानी, र बालबालिका र अभिभावक बीच प्रविधिको प्रयोगबारे बुझाइ फरक हुने कारण आपसी झगडा वा दूरी बढ्ने समस्या पछिल्लो समय घातक रूपमा देखिन थालेको छ। यसले बालबालिकाको शिक्षामा प्रभाव पर्नु, सामाजिक सम्बन्धहरू कमजोर हुनु, र संवेदनशीलता हराउने खतरा उत्पन्न गर्न सक्छ।
वैशाख १९ गते रिलिज हुने नेपाली चलचित्र ‘झिल्को’ले यही संवेदनशील विषयलाई उठान गरेको छ। हालै, यसको पोस्टर सार्वजनिक गरिएको छ, जहाँ स्कुले पोसाकमा एक बालिका हातमा मोबाइल बोकेर प्रस्तुत गरिएको छ, भने पछाडि एक वृद्ध पुरुषको भावुक अनुहार देख्न सकिन्छ। यसले चलचित्रको कथा पुस्तान्तरण, प्रविधिको कुलत, र त्यसले निम्त्याउने पारिवारिक टकराबलाई सङ्केत गर्छ।
प्रविधि आफैँ खराब होइन, तर त्यसको अनियन्त्रित र असावधानीपूर्ण प्रयोगले बालबालिकाको भविष्य, पारिवारिक सन्तुलन र सामाजिक स्वास्थ्यमा गम्भीर असर पार्न सक्छ भन्ने सन्देश बोकेको यो चलचित्रले एक बालिकाको डिजिटल लतको यात्रा प्रस्तुत गर्दछ, भन्ने निर्देशक यादवकुमार भट्टराईले बताए। यसअघि ऐतिहासिक तथा सामाजिक सन्देशमूलक चलचित्र ‘झोला’ निर्देशन गरेका यादवकुमार भट्टराईले अभिभावक, शिक्षक, नीति निर्माता र सम्पूर्ण समाज मिलेर बालबालिकालाई डिजिटल कुलतबाट जोगाउनु आजको आवश्यकता भएको कारण चलचित्रको माध्यमबाट आफूले कथा भन्न खोजेको बताए।
मिडिया फर कल्चर प्रा.लि. को ब्यानरमा निर्माण गरिएको चलचित्रमा आयुषी ढकाल, सुनिल पोखरेल, वर्षा सिवाकोटी, विशाल पोखरेल, भोलाराज सापकोटा, जान्वी बस्नेत, जेनीश श्रेष्ठ र जेभीश श्रेष्ठको अभिनय रहेको छ। चलचित्रको छायाङ्कन दीपक बज्राचार्य, सम्पादन निमेष श्रेष्ठ, कलर तथा साउन्ड मिक्सिङ श्याम कुँवर, र साउन्ड डिजाइन उत्तम न्यौपानेले गरेका छन्।
‘झिल्को’को कथा तथा पटकथा निर्देशक भट्टराईले अरुणदेव जोशी र देव व्रतसँग मिलेर तयार पारेका हुन्। मिडिया फर कल्चर प्रा.लि. को प्रस्तुति रहेको यसका कार्यकारी निर्माता उमेश पौडेल, निर्माता सुशीला आचार्य, रामगोपाल थापा र किरण कुमार आचार्य रहेका छन्, भने जनता टिभीको निर्माण सहकार्यमा तयार भएको हो।
